Tradhisi Sedekah Laut

Upacara tradhisi sedhekah laut dianakake minangka salah sijine pambudi kanggo ngumpulake nilai-nilai luhur kabudayan Jawa kang wis kawentar edi peni. Sedhekah laut dianakake dening masyarakat ing pesisir, mligine para tani lan nelayan. Sesaji mau minangka wujud rasa syukur marang gusti Kang Akarya Jagad dene para petani lan nelayan wis diparingi rejeki kang wis ditampa saka laut, mligine iwa. Tujuane supaya tansah pinaringan keslametan, ayem, tentrem, lan bisa kasembadan apa wae kang disedya.

            Ing sadhengah panggonan, tata cara sedhekah laut meh padha. Umpama ing laut Jawa lor meh pada karo laut jawa Kidul. Ing laut kidul, sedhekah laut dipunjungake marang Nyi Rara Kidul, wujude kain poleng, kain Teluk Watu, selembar semekan dringin, semekan songer, kain ngisep sari, kain pandhan binethot, kain bangun tolak, kain mori telung lembar, ageman gadhung mlathi. Ing tlatah laut Jawa Lor, adat saben nganggo endhas kebo ditambah ubarampe liyane, kanggo slametan lan dilarung ing laut utawa segara.

            Adicara adat ritual iki biyasane dianakake warga sakampung, sadesa dhong-dhong malah luwih, nganakake slametan bebarengan. Kabeh iku duweni pangajab supaya ditambahi kaslametan bebarengan. Kabeh iku duweni pangajab supaya ditambahi keslametan, oleh berkah saka Gusti. Umpamane wae yen nggolek iwak menyang segara oleh iwak akeh, praune ora kena ombak, nelayane padha slamet didohke godha, alangan saka segara. Kabeh iku mau wis dadi adat lan tradisi wong pantai utawa gisik umume.

            Adicara ritual kaya ing duwur, sumebar saindhening nuswantara, mligine ing tanah Jawa. Ing Semarang umpamane, wong-wong padha buwak sesaji ing laut mligine ing Tanjung Mas, Pantai Marina, lan panggonan liyane. Ing Demak, penere ing Desa Moro, Kecamatan Wedung, Demak uga ana adicara kaya ing dhuwur kang diarani Labuhan. Ing Ngayogyakarta dipusatake ing pesisir Parang tritis lan isih akeh liyane.

            Sawise kabeh adicara ritual mau dilakoni, puncaking acara kanthi nanggap wayang kulit, wayang wong, kethoprak, lsp. Dene naliko nanggap wayang kulit, njupuk lakon Semar Mbangun Khayangan, babat Alas Wanamarta, Rama Tambak, Sesaji Jaka Surya, Semar Mbangun Negara, lsp.